Naxçıvanda qanunsuz dərman vasitələri satışının qarşısı alınıb
Bütün bunlara baxmayaraq, bəzi şəxslər dələduzluq yolu ilə vətəndaşların etibarından sui-istifadə edərək onların sağlamlığına böyük zərbə vururlar.
Naxçıvan Muxtar Respublikası Dövlət Təhlükəsizliyi Xidmətinin əməkdaşları tərəfindən keçirilən əməliyyat-axtarış tədbirləri nəticəsində bir qrup şəxs tərəfindən külli miqdarda dərman preparatlarının qanunsuz olaraq muxtar respublika ərazisinə gətirilməsi və satışının təşkilinin qarşısı alınıb.
Aparılan araşdırmalar zamanı məlum olub
ki, Babək rayonunun Nehrəm kənd sakini Həmzəyev Təhməz Əvəz oğlu Səhiyyə
Nazirliyi tərəfindən verilən xüsusi icazə, lisenziya əldə etmədən
qanunsuz olaraq sahibkarlıq fəaliyyəti ilə məşğul olub. O, heç bir tibbi
təhsili olmadığı halda qanunsuz olaraq bir qrup şəxslə əvvəlcədən
razılığa gələrək dövlət qeydiyyatına alınmamış və normativ-texniki
tələblərə cavab verməyən dərman preparatlarının muxtar respublika
ərazisindəki əczaxanalarda satışını təşkil edib.
Təhməz Həmzəyev
sosial şəbəkələrdəki (facebook və instaqram) səhifələrində özünü
insanlara həkim kimi təqdim edərək daha geniş ictimaiyyət arasında
tanınmağa çalışıb. Təhməz Həmzəyev bu qanunsuz fəaliyyətini bir qrup
şəxslə birlikdə həyata keçirib.
Qeyd etdiyimiz kimi, qruplaşma
üzvləri dərman məhsullarını satmaq məqsədilə instaqramda "Naxçıvan hekim
meslehetleri” və "Tiens group Naxçıvan” səhifələri yaradıblar. Sonra
qrupun üzvlərindən olan, özünü "Əsəd həkim” kimi insanlara təqdim edən
Əsəd Cəfərov həmin səhifələr vasitəsilə Çinin "Tiens” firmasının dərman
məhsullarını reklam etməyə başlayıb. Həmin səhifələr vasitəsilə
dərmanların qanunsuz olaraq onlayn satışı ilə yanaşı, insanlara
xəstəlikləri ilə bağlı həkim məsləhətləri veriblər. Müraciət edən hamilə
qadına özünü ginekoloq kimi tanıdan bu şəxslər insanları aldadaraq
doğuş öncəsi tibbi müayinə təyin edib, bel sümüyündə əyrilik problemi
ilə müraciət edən digər bir qadına isə müalicə təyinatı üçün kürəyinin
şəklini çəkərək onlara yollamasına nail olub, həmçinin ayrı-ayrı
şəxslərə özlərini kardioloq, androloq, psixoloq kimi tanıdaraq onlara
təsəvvürləri olmayan həkimlik sahəsi üzrə müalicə təyin ediblər.
Təhməz
Həmzəyev daha sonra orta təhsilli, fəhlə işləyən Şərur rayonunun
Qarahəsənli kənd sakini Hüseynov Qiyas Abuzər oğlu və Culfa rayonunun
Boyəhməd kənd sakini İmranlı Ürfan Ramazan oğlu ilə tanış olaraq
dərmanların satışını həyata keçirmək məqsədilə razılığa gəlib. Qiyas
Hüseynovu dərman satışı sahəsində mütəxəssis kimi yetişdirəcəyini, ondan
bu istiqamətdə imtahan götürməklə səviyyəsini müəyyənləşdirəcəyini
bildirib və ona "Tiens” firmasının dərman kataloqunu verib.
Təhməz
Həmzəyev görüşdüyü şəxslərə qazancın 15-20 faizini təklif edib. Lakin
Qiyas Hüseynov və Ürfan İmranlı Təhməz Həmzəyevin fəaliyyətində
dələduzluq olduğunu hiss edərək ondan uzaqlaşsalar da, vətəndaşlıq
məsuliyyətini dərk etməyərək bu barədə hüquq-mühafizə orqanlarına
məlumat verməyiblər.
Təhməz Həmzəyev dərmanların satışını təşkil
etmək məqsədilə əczaxanalardan istifadə etmək qərarına gəlib. Bunun üçün
Naxçıvan şəhəri, Atatürk 5 ünvanında yerləşən "Prestij” əczaxanasında
işləyən Babək rayonunun Cəhri kənd sakini Əhmədov Sadiq Əmir oğlu ilə
görüşərək, Çindən gətiriləcək dərman vasitələrinin satışını təşkil etmək
barədə razılıq əldə edib. Onlar həmin dərman vasitələrini vətəndaşlara
satarkən Dövlət Təhlükəsizliyi Xidməti əməkdaşları tərəfindən
saxlanılıblar. Hazırda fakt üzrə müvafiq tədbirlər həyata keçirilir.
Qeyd edək ki, ölkəmizdə əhalinin keyfiyyətli və təhlükəsiz dərman
vasitələri ilə təmin edilməsi məqsədilə bir sıra qanunlar qəbul olunub.
"Dərman vasitələri haqqında” Azərbaycan Respublikasının Qanununa əsasən
əraziyə idxal olunan dərman vasitələri müvafiq icra hakimiyyəti orqanı
tərəfindən dövlət qeydiyyatına alınır və sertifikatlaşdırılır. Əraziyə
dərman idxalına yalnız xüsusi icazə – lisenziya əsasında icazə verilir.
Yalnız vətəndaşlar şəxsi istifadə üçün zəruri miqdarda dərman vasitəsini
özləri ilə xaricdən gətirə bilərlər. Bildirmək istəyirik ki, idxal
olunan dərman vasitələrinin təyinat göstəricilərində Azərbaycan dilində
istehsal edən ölkənin və istehsalçının adı, hüquqi ünvanı, hazırlanma
tarixi və seriya nömrəsi, tətbiq olunma qaydası, dozası, yararlılıq
müddəti, saxlanma şəraiti, tətbiqi zamanı təhlükəsizlik tədbirləri,
əksgöstərişləri və yan təsirləri barədə məlumatları özündə əks
etdirməlidir. Lakin Təhməz Həmzəyevin yaşadığı mənzilə baxış zamanı
aşkar edilib ki, o, dərman vasitələrinin saxlanma şəraitinə əməl etməyib
və heç bir normativ-hüquqi akta uyğun gəlməyən, antisanitar şəraitdə
saxlayıb.
Saxlanılan şəxslərin fəaliyyətində dərman vasitələrinin
qanunsuz dövriyyəsi, qanunsuz sahibkarlıq ilə yanaşı, son dövrlər
beynəlxalq fırıldaqçılıq şəbəkəsi kimi tanınan Piramida Şəbəkə Marketinq
fəaliyyəti də ortaya çıxıb. Belə ki, şəbəkəyə daxil olan şəxs məhsulu
baha qiymətə aldıqdan sonra məhsulların satışına əlavə şəxslər cəlb
edir, cəlb etdiyi hər şəxsə görə əlavə faiz alır, cəlb olunan şəxslər də
yeni insanlar cəlb etməklə qazanc əldə etməyə çalışırlar. Nəticədə,
piramidanın başında olan şəxslər külli miqdarda qazanc əldə etsələr də,
aşağıda olan şəxslər fırıldaqçılığın qurbanına çevrilirlər.
Bütün
bunlar bir daha onu göstərir ki, bu cür dələduzlara aldanmaq olmaz.
Çünki sağlamlığımız bizim ən böyük sərvətimizdir. Bu cür insanların
qanunsuz əməllərindən uzaq olmaq, qanun-qaydalara əməl etmək lazımdır.