Bütöv tərkibdə toplaşan şuranın üzvləri qarşıda duran vəzifələr, gələcək fəaliyyətin təşkili, görüləcək işlər və nəzərdə tutulmuş layihələr barədə müzakirələr aparıblar.

Şuranın sədri, mədəniyyət və turizm naziri Əbülfəs Qarayev Azərbaycan Respublikası Prezidentinin 2016-cı il 27 dekabr tarixli Fərmanı ilə təsdiq edilmiş Turizm Şurası haqqında Əsasnamədə qarşıya qoyulmuş məqsədlər və onların həlli yoları baradə məlumat verib.

Azərbaycanda turizm sənayesinin inkişafı istiqamətində görülən işlərdən söz açan nazir deyib ki, ölkə başçısı tərəfindən təsdiq edilən "Azərbaycan Respublikasında ixtisaslaşmış turizm sənayesinin inkişafına dair Strateji Yol Xəritəsi” bu sahədə dönüş yaradacaq və yeni bir mərhələ olacaq.

Şura üzvləri qarşıya qoyulmuş məqsədlərə çatmaq üçün birgə səylərin səfərbər olunması barədə fikir mübadiləsi aparıblar.