Türkiyədən Almaniyaya ULTİMATUM
Türkiyə almaniyalı deputatların "İncirlik” aviabazasına gözlənilən səfərlə bağlı Almaniya hökumətinə ultimatum verib.
Adalet.az-ın APA-ya istinadən xəbərinə görə, bu barədə "Der Spiegel” nəşri məlumat yayıb.
Məlumata görə, Ankara iyun ayından etibarən almaniyalı deputatlardan ibarət nümayəndə heyətinin aviabazaya səfər etməsinə icazə vermir. Qeyd edək İŞİD-ə qarşı mübarizə aparan bundesver qüvvələri "İncirlik” bazasında yerləşdirilib.
Nəşr qeyd edir ki, Almaniya XİN-i hazırda tələsik bütün tərəfləri qane edə biləcək qərar tapmağa çalışır.
Almaniyanın Avropa məsələləri üzrə dövlət naziri Mixael Rot bu həftə Türkiyəyə etdiyi səfəri zamanı çıxışında bildirib ki, Bundestaqın qətnaməsində 1915-ci il hadisələri ilə bağlı Almaniyanın məsuliyyət daşıması ifadəsi əks olunub. O qeyd edib ki, sənəd heç də Türkiyənin hazırkı hakimiyyətinə qarşı yönəlməyib, söhbət almanların günahkar olmasını qəbul etməsindən gedir.
"Der Spiegel” bu cür jestlərin Ankara üçün qeyri-qənaətbəxş olduğunu qeyd edir: "Ankara Almaniya hökumətindən müvafiq bəyanatı ən yüksək səviyyədə - kansler və ya XİN rəhbəri səviyyəsində səsləndirməsini tələb edir”.