Qanunla nəzərdə tutulmuş hallarda sertifikasiyadan keçirilməyən şəxslər ali təhsil haqqında sənədin və olduğu halda, ixtisaslaşma haqqında sənədin surətlərini ərizələrinə əlavə etməlidirlər. Dəyişikliyə əsasən bundan sonra namizəd işə qəbul olunmaq üçün ixtisasına və ya baza təhsilinə uyğun 5 vakant yer seçə biləcək. İndiyə qədər namizəd 1 yer seçə bilərdi. Namizədin topladığı bal onun seçdiyi 5 vakant yerə uyğun olaraq ardıcıllıqla yoxlanılacaq. Vakant elan edilmiş vəzifəyə təyin olunmaq üçün həmin vəzifəyə namizədlər arasında daha yüksək bal toplamış şəxs seçiləcək.

Dəyişikliyə əsasən, müsabiqə ilə bağlı komissiyanın hüquqları da azaldılıb. İndiyə qədər Komissiya müstəqil olaraq müsahibələrin keçirilməsi üçün müvafiq mütəxəssisləri cəlb edə bilərdi. Dəyişikliyə əsasən artıq Komissiya müsabiqənin keçirilməsi üçün yalnız səhiyyə naziri tərəfindən siyahısı təsdiq edilmiş mütəxəssislərdən müsabiqənin keçirilməsi üçün vakant elan edilmiş vəzifələrə uyğun olanları cəlb edə bilər. Komissiya üzvlərinin səlahiyyət müddəti 5 il olması və konkret say tərkibi ilə bağlı müddəa da ləğv olunub. Sadəcə, səhiyyə müəssisələrində vakant elan edilmiş həkim ixtisasları üzrə vəzifələrə həkimlərin mərkəzləşdirilmiş qaydada işə qəbulu tərkibi səhiyyə naziri tərəfindən müəyyən edilmiş komissiya tərəfindən həyata keçiriləcək.