1

Şəhər.

Səhər.

Adamlardan betər

Yuxulu avtobuslar

Nərildəyə-nərildəyə

Sağa-sola burulduqca,

Ağzı üstə aşacaq, deyəsən!

Düz yolda uçacaq, deyəsən!

2

Şəhər.

Səhər.

Avtobusun radiosunda

Son xəbərlər.

Yağı əlində inləyən torpaqlarda

Leysan yağış yağır - güllələr!

Düşmən ağır zərbə alıb

Top-tüfəngi, texnikası

Yerdə qalıb

Qaçır düşmən!

Qaçır!

Mərd biləkli oğulların atəşləri

İldırım tək,

Şimşək tək ölüm saçır.

Düşmən qaçır!

Görən harda siçan deşiyi var?

Əgər bir yer tapmırlarsa,

Özünü versin hara?

Torpaq özü də səngərdi!

Torpaq özü də əsgərdi!

Düşmənə aman verməz!

Düşmənə aman yoxdu!

Aman yoxdu, igid əsgər!

Aman vermə, igid oğul!

Bu torpağın qisasını almaq -

borcun

Anaların, bacıların,

Şəhid olan oğulların

Qisasını almaq borcun!

Ata borcu!

Ana borcu!

Bacı borcu!

Oğul borcu!

Düşmən borcu!

Dağlar sənin arxandadı,

Çaylar-çöllər, daşlar-güllər,

Bütün ellər arxandadı -

Yağı qaçır,

Qaçır, qaçır!

İrəli!

İrəli!

Addımların iti olsun,

Mətin olsun!

Əllərinə qüvvət sənin!

Cəsarətin, mətanətin

Hünər olsun, qeyrət olsun,

Heyrət olsun!

Qov namərdi,

Qov düşməni!

Leş-baş elə -

Qurda-quşa yem gərəkdi!

Qov namərdi,

Qov düşməni!

Qoy qalmasın torpağımda

Yağı izi, ya nəfəsi!

Kəsilsin biryolluq səsi!

3

Şəhər.

Səhər.

Xəbərlər.

Yağı caynağından azad olubdu

neçə kənd, neçə təpə,

neçə bulaq, neçə dərə!

Azərbaycan bayrağıdır dalğalanır,

bayraq olub Lələtəpə!

Üç rənglidir mavi səma!

Üç rənglidir dağ da, daş da!

Üç rənglidir yaz da, qış da!

4

Şəhər.

Səhər.

Xəbərlər.

Şəhid olub neçə igid döyüşlərdə:

Hamı ayaq üstündədir!

Şəhidlərə borclarını verirlər!

Üzdə - qələbə sevinci!

Gözlərdə işıq, təbəssüm!

Ürəklərdə fəxr - fəxarət!

Sükut pozulur nəhayət!

İrəlidə,

anasının qucağında duran körpə uşaq

himn oxuyur!

Azərbaycan himnini!

"Azərbaycan! Azərbaycan!

Ey qəhrəman övladın şanlı vətəni!"

O oxuyur!

Dayanmadan,

tələsmədən,

asta-asta,

aram-aram

Bir yol çaşmır!

Himn oxuyur körpə üşaq

Şəhərə,

Səhərə!

Zəfərə!

Hamı ayaq üstündədir,

hamı əmrə müntəzir!

Üç yaşlı

körpə üşaq

himn oxuyur,

üç rəngli bayrağımsa

zirvələrə yüksəlir!

5

Səhər.

Səhər.

Xəbərlər.

Lələtəpə.

Şəhidlərə himn oxuyur

üç yaşlı körpə!